१३ औं दक्षिण एसियाली खेलकुद (साग)का खेल आजबाट सुरु

काठमाडौँ — नेपालले बंगलादेशसँग बुधबार दिउँसो ३ बजे महिला भलिबलमा प्रतिस्पर्धा गरेसँगै १३ औं दक्षिण एसियाली खेलकुद (साग) का खेल सुरु हुनेछ । आइतबार भव्य समारोहबीच उद्घाटन भएपछि मात्र १३ औं सागले औपचारिकता पाउनेछ ।

भलिबल ५ दिनअगाडि नै सुरु हुन लागेको हो । भलिबल सकिएपछि राष्ट्रिय खेलकुद परिषद्स्थित कभर्डहलमा मंसिर १९ देखि बास्केटबल र थ्री बाई थ्री बास्केटबल हुनेछ । बुधबार नै महिला भलिबलमा पाकिस्तान र माल्दिभ्सको प्रतिस्पर्धा हुने कार्यक्रम छ । नेपाल र बंगलादेशससँगै समूह ‘ए’ मा भारत रहेको छ । समूह ‘बी’ मा श्रीलंका, माल्दिभ्स र पाकिस्तान छन् ।

पुरुष भलिबल पनि बुधबारै सुरु हुनेछ । साँझ ७ बजे हुने दिनको एकमात्र खेलमा नेपालले बंगलादेशको सामना गर्नेछ । पुरुषको समूहमा पनि समूह ‘ए’ नेपाल, भारत र बंगलादेश तथा समूह ‘बी’ मा श्रीलंका, माल्दिभ्स र पाकिस्तान रहेका छन् ।

भलिबलमा प्रतिस्पर्धा गर्न भारतीय टोली अझै काठमाडौं आइपुगेको छैन । महिलामा भारतले नेपालसँग बिहीबार दिउँसो ५ बजे तथा पुरुषमा बंगलादेशसँग ३ बजे खेल्ने कार्यक्रम छ । भारत नआए पनि मंगलबार प्राविधिक समितिको बैठक बसेर खेलतालिका तय गरेको थियो ।

त्यस्तै टेबलटेनिसमा भुटानले सहभागिता नजाउने भएको छ ।

टेनिसको पुरस्कार घोषणा