सवारी दुर्घटना न्यूनिकरणमा जोड
बुटवल । यातायात मजदूर तथा व्यवसायी भलाई कोष बुटवलको ४४ औं वार्षिक साधारण सभा मंगलबार सम्पन्न भएको छ ।
साधारण सभाको उदघाटन गर्दै कोषका पुर्व अध्यक्ष एवं मानार्थ सदस्य कुमार थापा मगरले दुर्घटना न्युनीकरण र दुर्घटना पछिको व्यवस्थापकीय भूमिकामा भलाई कोषले महत्वपूर्ण भूमिका खेलेको बताए ।
“दुर्घटना न्युनीकरण र क्षतिपुर्तीको विषय राज्यले अगाडि बढाउनुपर्ने हो, तर राज्यले गर्नुपर्ने काम भलाई कोषले गरेको छ”–थापाले भने । उनले बढ्दो दुर्घटना कम गर्न जनचेतनामूलक कार्यक्रमलाई प्रभावकारी ढंगले सञ्चालन गर्न पनि यातायात सम्बद्ध संस्थाहरुलाई आग्रह गरे ।
थुप्रै समस्या र चुनौतीको सामना गर्दै आएको कोषमाथि अहिले पनि थुप्रै चुनौती रहेको भन्दै थापाले चुनौतीको सामना गर्न सिंगो टिम एक ढिक्का भएर लाग्नुपर्नेमा जोड दिए । उनले चालक होसियार भए दुर्घटना न्यूनिकरणमा ७५ प्रतिशतले कमी आउने दावी गरे ।
वार्षिक प्रतिवेदन प्रस्तुत गर्दै कोषका अध्यक्ष दिनेश फुल्लेलले सवारीसाधनको वृद्धिसँगै दुर्घटनामा पनि वृद्धि हुँदै गएको र यसले थप चुनौती सिर्जना गरेको भन्दै चुनौतीलाई अवसरको रुपमा लिएर अघि बढ्ने बताए । कोभिड १९ को प्रत्यक्ष मारमा यातायात क्षेत्र परेको र मजदूरहरु यसबाट बढी प्रभावित भएको भन्दै उनले सवारी दुर्घटना पश्चात घाइतेहरुलाई महंगा अस्पतालहरुमा उपचार गराउन लैजाने प्रवृत्तिले कोषले ठूलो आर्थिक लगानी गर्नुपरेको बताए ।
बिगतमा कोषमा आवद्ध नभएका सवारी साधनहरु पछिल्ला दिनमा आवद्ध हुँदै गएको र यो कोषको लागि महत्वपूर्ण अवसर रहेको भन्दै अध्यक्ष फुल्लेलले कोषबाट इ सेवा मार्फत पनि सेवा उपलव्ध गराउन पहल भैरहेको जानकारी दिए ।
यो पनि पढ्नुहोस्
