नेपालमा पछिल्लो २४ घण्टामा थप ७६६० जनामा कोरोना पुष्टि
काठमाडौँ । नेपालमा पछिल्लो २४ घण्टामा थप ७ हजार ६६० जनामा कोरोना पुष्टि भएको छ । स्वास्थ्य तथा जनसंख्या मन्त्रालयका प्रवक्ता डा.जागेश्वर गौतमका अनुसार देशभरका विभिन्न प्रयोगशालामा १६ हजार १३१ जनाको पीसीआर परीक्षणमा ७ हजार ५८७ र ५७१ को एन्टिजेन विधिबाट गरिएको परीक्षणमा ७३ जनामा कोरोना पुष्टि भएको छ ।
पछिल्लो २४ घण्टामा थप ५५ जना कोरोना संक्रमितको मृत्यु भएको मन्त्रालयले जनाएको छ । नेपालमा कोरोना भाइरस संक्रमणबाट हालसम्म तीन हजार ४१७ जनाको मृत्यु भएको छ ।
हालसम्म देशभर सक्रिय संक्रमितको संख्या ५९ हजार ७९८ रहेको छ । जसमध्ये ५५ हजार ५२० जना होम आइसोलेसनमा र संस्थागत आइसोलेसनमा चार हजार २७८ जना रहेका छन् । हालसम्म ६१६ जना आईसीयूमा र १७९ जना भेन्टिलेटरमा उपचाररत छन् ।
नेपालमा हालसम्म कोरोना भाइरस संक्रमण हुनेको संख्या तीन लाख ५१ हजार पाँच पुगेको छ । जसमध्ये दुई लाख ८७ हजार ७९० जना संक्रमण मुक्त भएका छन् । पछिल्लो २४ घण्टामा कोरोना भाइरस संक्रमणमुक्त हुनेको संख्या एक हजार ७७५ रहेको छ ।
यो पनि पढ्नुहोस्
