पछिल्लो २४ घण्टामा ८२०३ जनामा कोरोना पुष्टि, १९६ को मृत्यु
काठमाण्डौं । पछिल्लो २४ घण्टामा ८ हजार २०३ जनामा कोरोना पुष्टि भएको छ । स्वास्थ्य तथा जनसंख्या मन्त्रालयका अनुसार २० हजार २८६ नमुनाको पीसीआर परीक्षण गर्दा ८ हजार १३६ जना र ६९३ नमुनाको एन्टिजेन परीक्षण गर्दा ६७ जनामा कोरोना भाइरसको संक्रमण देखिएको हो । यो संगै हालसम्म नेपालमा कोरोना संक्रमितको कुल संख्या ४ लाख ७२ हजार ३५४ पुगेको छ ।
मन्त्रालयका अनुसार पछिल्लो २४ घण्टामा १९६ जना कोरोना संक्रमितको मृत्यु भएको छ । योसँगै नेपालमा कोरोना संक्रमितको मृत्यु हुनेको संख्या ५ हजार ४११ पुगेको मन्त्रालयले जनाएको छ ।
त्यसैगरी पछिल्लो २४ घण्टामा ६ हजार ८९१ जना कोरोना मुक्त भएका छन् । योसँगै हालसम्म ३ लाख ५२ हजार ४१४ जना निको भएका छन् ।
हाल देशभर सक्रिय संक्रमितको संख्या १ लाख १४ हजार ५२९ रहेको छ । उनीहरुमध्ये १ लाख ७ हजार ८२ जना होम आइसोलेसनमा रहेका छन् भने ७ हजार ४४७ जना संस्थागत आइसोलेसनमा छन् । यस्तै १ हजार ५९० जनाको आईसीयू र ३९० जनाको भेन्टिलेटरमा उपचार भइरहेको मन्त्रालयले जनाएको छ ।
यो पनि पढ्नुहोस्
