‘सरल र रुकावटबिना ठूला योजना सञ्चालन हुने नीति बनाउनु पर्छ’- अर्थमन्त्री शर्मा
काठमाडौं । अर्थमन्त्री जनार्दन शर्माले विकास निर्माण सहजीकरण कानूनमा ठूला योजनालाई सरल र रुकावटबिना सञ्चालन गर्ने व्यवस्था गर्नु पर्ने बताउनु भएको छ । बुधबार मन्त्रालयमा भएको विकास निर्माण सहजीकरण कानून सम्बन्धी छलफलमा यस्तो बताउनु भएको हो ।
मन्त्री शर्माले झन्झटिलो कानून र विभिन्न किसिमका रोकावटले ठूला आयोजना रोकिँदै आएकाले अब त्यस्तो व्यवस्था हटाउनु पर्ने धारणा राख्नु भएको हो । ‘अख्तियार, कानून तथा अदालत लगायतले ठूला आयोजनाहरू नरोकिउन्’, मन्त्री शर्माले भन्नु भयो, ‘सरल र रुकावट बिना ठूला योजना सञ्चालन हुने नीति बनाउनुपर्छ ।’
उहाँले आर्थिक जीवनमा परिवर्तन ल्याउने योजना छनोट गरी तिनलाई कसैले रोक्न नसक्ने किसिमको कानून तर्जुमा गर्नु पर्ने बताउनु भएको हो ।
राजनीतिक प्रकृति र राजनीतिक आवश्यकताका आधारमा योजनालाई छुट्याउन आवश्यक रहेको बताउनु भयो । कतिपय राजनीतिक प्रकृतिका योजनाका कारण खर्च हुन नसकेको भन्दै उहाँले आवश्यकताका आधारमा योजनाको छनोट गर्नुपर्नेमा धारणा राख्नुभयो ।
उहाँले कानुन निर्माताहरूले विगतमा राम्रो सँग अध्ययन नगरीकनै कानून पास गरिदिँदा पनि अहिले समस्या निम्तिएको जिकिर गर्नुभयो । त्यसैले अब सूक्ष्म अध्ययन गरेर कानून निर्माण गर्नुपर्ने उहाँले बताउनुभयो ।
यस्तै हरेक टेबल–टेबलमा आफ्नै किसिमको मनमौजीले विकास निर्माणका कार्यहरू रोकिने गरेको भन्दै त्यस्तो मानसिकता त्याग्नु पर्ने पनि मन्त्री शर्माले बताउनुभयो ।
बैठक मुख्यसचिव शंकरदास बैरागी, अर्थसचिव मधु कुमार मरासिनी तथा विभिन्न मन्त्रालयका सचिव तथा प्रतिनिधिको सहभागितामा भएको थियो । बैठकमा वर्तमान खरिद कानून, पुँजीगत खर्चको लक्ष्य प्राप्तिमा समस्या, निकायगत समन्वयको अवस्था तथा वित्तीय अनुशासन लगायतका विषयमा छलफल भएको थियो ।
यो पनि पढ्नुहोस्
