बुटवल उवासंघमा गैरसरकारी संस्थासंग विजनेश इन्कुवेशन कार्यक्रम सम्बन्धि छलफल

बुटवल । बुटवल उद्योग वाणिज्य संघ, रुपन्देहीमा गैरसरकारी संस्थाका प्रतिनीधिहरुसंग नवउधमी प्रवद्र्धनको लागि सञ्चालन गर्न लागिएको विजनेश इन्कुवेशन (नव उधमशाला) कार्यक्रम सम्बन्धि छलफल गरिएको छ ।

विजनेश इन्कुवेशन कार्यक्रम सञ्चालन गरेको प्रमुख साझेदार संस्था बुटवल उद्योग बाणिज्य संघको आयोजनामा बुधबार बुटवलमा त्यस विषयमा छलफल गरिएको छ । विजनेश इन्कुवेशन कार्यक्रमको बारेमा प्रकाश पार्दै बुटवल उद्योग बाणिज्य संघका अध्यक्ष उज्ज्वल प्रसाद कसजूले नवउधमीलाई सीप, श्रम र लगानीको संयोजन मिलाउनको लागि विजनेश इन्कुवेश कार्यक्रम गर्न लागिएको बताउनु भयो ।

बुटवल उद्योग बाणिज्य संघ रुपन्देही, अन्तरप्रेरणा, लुम्बिनी वाणिज्य क्याम्पस र युवा उद्यमी मञ्च रुपन्देहीको संयुक्त आयोजनामा अघिल्लो वर्ष पनि विजनेश इन्कुवेशन कार्यक्रम गरिएको थियो । नवउधमीका लागि अत्यन्तै फलदायी भएकोले तीनै साझेदारहरुको सहकार्यमा नवउधमीको लागि यो वर्ष पन कार्यक्रमलाई निरन्तरता दिईएको उहाँले बताउनु भयो ।

त्यस्तै संघका सल्लाहकार तथा पूर्व अध्यक्ष नवराज श्रेष्ठले उद्योग व्यवसाय मुलुकको अर्थतन्त्रको कडी भएपनि एकातिर उद्योग व्यवसाय सञ्चालनको राम्रो वातावरण नहुनु र अर्कोतिर पुँजी, सीप र श्रमको समुचित व्यबस्थापन नहुँदा उद्योग व्यवसाय फस्टाउन नसकिरहेको भनाई राख्नुभयो ।

संघका उद्योग उपाध्यक्ष टंकप्रसाद गैरेले संघले औद्योगिक बिकासका लागि व्यवसायिक वातावरण निर्माण तथा उद्यमशिलता बिकासका कार्यक्रम सञ्चालन गर्दै आएको बताउँदै यस क्षेत्रको आर्थिक तथा सामाजिक विकासमा संघले उल्लेखनीय योगदान गरेको स्मरण गर्नुभयो ।

नवउधमीलाई सफल उद्योगी व्यबसायी बनाउने योजना सहित सञ्चालन गर्न लागिएको कार्यक्रमको लागि संघले कार्यक्रममा सहभागि हुन आवेदन आह्वान गरिसकेको छ । उद्योग व्यवसायमा भएका समस्या पहिचान गर्न र त्यसको समाधानको लागि पनि विजनेश इन्कुवेशन कार्यक्रम आयोजना गरिएको संघका कार्यकारी निर्देशक मदनकुमार कार्कीले जानकारी गराउनु भयो ।

नौलो सौच भएका, नौलो व्यवसायिक योजना र जाँगर भएका नवउधमीलाई सफल उधमी बनाउनको लागि विजनेश इन्कुवेश कार्यक्रम आयोजना गरिएको बताउँदै संघका कार्यक्रम अधिकृत केशव ढकालले अघिल्लो वर्ष सञ्चालन भएको कार्यक्रमले आफूहरुमा थप उर्जा थपिएको उल्लेख गर्नुभयो ।

कार्यक्रममा बोल्दै युएनडिपिका प्रतिनीधि सुदिप अर्यालले उधमी अनुकुलको शहर बनाउने अभियानमा संगसंगै यात्रा गर्न आफू पनि तयार रहेको भनाई राख्नुभयो । त्यस अवसरमा सहभागि गैरसरकारी संस्थाका प्रतिनीधिहरुले कृषि, पशुपालन लगायतका क्षेत्रमा राम्रो अवसर भएपनि त्यसमा लगानी गरेका उधमीहरुलाई गाईड लाईनको अभावमा प्रभावकारी हुन नसक्ने वा बिचमै पेशा छाड्नु पर्ने परिस्थिती देखिएको बताएका थिए ।

त्यस्तै विदेशमा रोजगारी गरेर फर्किएका युवालाई पनि कसरी उधमी बनाउन सकिन्छ त्यसतर्फ पनि सोंच्नु पर्ने भन्दै यस्ता कार्यक्रममा आफूहरुको पूर्ण सहयोग रहने प्रतिवद्धा व्यक्त गरेका थिए ।