तिलोत्तमाको मेयरमा गठबन्धनबाट काँग्रेसका खाँणको उम्मेदवारी दर्ता

बुटवल ।  रुपन्देहीको तिलोत्तमा नगरपालिकाको मेयरका लागि नेपाली काँग्रेसका रामकृष्ण खाँणले उम्मेद्वारी दर्ता गराउनु भएको छ । पाँच दलिय गठबन्धन भने पनि यो नगरपालिकामा काँग्रेस र नेकपा माओवादी केन्द्र बिच तालमेल भएको छ ।

उपमेयरमा माओवादी केन्द्रका हेमन्त पाण्डेले उम्मेदवारी दर्ता गराउनुभएको हो । दिउँसो ३ बजे निर्वाचन अधिकृतको कार्यालय पुगेर गठबन्धनका तर्फबाट काँग्रेसका खाँण र माओवादीका पाण्डेले उम्मेदवारी दर्ता गराउनुभएको हो ।

मनोनयन दर्ता गराएपछि खाँणले तिलोत्तमा नगरपालिकालाइ देशकै स्वच्छ, सुन्दर, हरियाली र समृद्ध नगरपालिकाको रुपमा विकास गर्ने प्रतिवद्धता जनाउनुभयो ।  आफु निर्वाचित भए नगरपालिकाबाट पाउने तलब भत्ता समेत नलिइ बालबालिकाको शिक्षा र जेष्ठ नागरिकको स्वास्थ्यमा लगानी गर्ने बताउनुभयो ।  नगरपालिका भित्रको खेतीयोग्य जमिनमा आधुनिक कृषि प्रणाली मार्फत कृषिको व्यवसायीकरण गर्ने, उत्पादनमुलक उद्योगमा लागनी भित्र्याउन लागानी मैत्री वातावरण बनाउने, शिक्षा, स्वास्थ्य, सडक, फोहोर व्यवस्थापन, खानेपानी जस्ता विकासका पूर्वाधार तयार गरी समृद्ध नगर बनाउने विशेष योजना सहित मेयरका उम्मेद्वारी दिएको र आफुले गरेका बाचा पुरा गरेरै छाड्ने खाँणले बताउनुभयो ।  जनतालाइ झुटो आश्वासन नबाँड्ने भन्दै उनले आफुले बोलेका कुरा पुरा गरेरै छाड्ने प्रतिबद्धता दोहोर्याउनुभयो ।

को हुन खाँण

मेयरका उम्मेद्वार खाण नेपाली काँग्रेस रुपन्देहीका सभापती पनि हुनुहुन्छ ।  यसअघिको स्थानीय निर्वाचनमा पनि उहाँ तिलोत्तमाको मेयरमा उठ्नु भएको थियो ।  नेपाली काँग्रेसको राजनीति गरेपनि आम जिल्ला बासीकालागि परी आउदा साझा नेताको रुपमा सहयोगी भुमिका खेल्ने भएकाले उहाँ रुपन्देहीको राजनीतिक बृत्तमा चर्चित र लोकप्रिय हुनुहुन्छ । २०२२ सालमा रुपन्देहीको मणिग्राममा जन्मनुभएका नेता खाँणको परिवार उहाँ नजन्मदै १०१७ सालमा रुपन्देही झरेको हो ।

उहाँ गृहमन्त्री तथा नेपाली काँग्रेसका केन्द्रिय सदस्य बालकृष्ण खाणका भाइ हुनुहुन्छ । उहाँका पिता पनि काँग्रेसको राजनीतिमा सक्रिय हुनुहुन्थ्यो । बाल्यकालमा २०३५ सालदेखि नै उहाँ बुवा र दाइको पदचाप पछ्याउँदै पञ्चायत बिरोधी आन्दोलनमा लाग्नु भएको थियो । २०४७ सालमा बुटवल बहुमुखी क्याम्पसको स्ववीयु इकाइको कोषाध्यक्ष हुनुभएको थियो । । २०५४ सालमा उहाँ काँग्रेस रुपन्देहीको जिल्ला कार्यसमिति सदस्य हुनुभयो ।  २०६६ सालमा जिल्ला सचिव हुनुभयो ।  त्यसपछिका कार्यकाल पनि सचिव हुनुभएका उहाँ गत मंसिरमा सम्पन्न पार्टीको महाधिवेशनबाट काँग्रेस रुपन्देहीको सभापतीमा निर्विरोध निर्वाचित हुनुभएको हो ।