तिलोत्तमाको प्रमुखमा कांग्रेसका खाँण र उपप्रमुखमा एमालेकी चौधरी बिजयी
बुटवल । रूपन्देहीको तिलोत्तमा नगरपालिकाको प्रमुखमा नेपाली कांग्रेसका रामकृष्ण खाँण विजयी भएका छन् । भने उपप्रमुखमा नेकपा एमालेकी जगेश्वरदेवी चौधरी विजयी भएकी छन् । नेकपा एमालेका उम्मेदवार मोहन चापागाईलाई हराउंदै रामकृष्ण खांण विजयी भएका हुन । खांडले ७ सय ६५ बढी मत प्राप्त गरी नगरप्रमुखमा निर्वाचित भए । खाँणले २४ हजार ३९६ मत प्राप्त गरेका छन् भने उनका निकटतम प्रतिस्पर्धी एमालेका मोहन चापागाईंले २३ हजार ६३१ मत प्राप्त गरेका थिए । गठबन्धनका तर्फबाट उम्मेदवार बनेका माओवादी केन्द्रका हेमन्त पाण्डेलाई ११ हजार मतान्तरले पराजित गर्दै उपप्रमुखमा जगेश्वरदेवी चौधरी विजयी भएकी हुन् ।
कांग्रेसका रुपन्देही जिल्ला सभापति समेत रहेका रामकृष्ण खांण २०७४ सालको निर्वाचनमा एमालेका बासुदेव घिमिरेसँग दुई हजार सातसय मतान्तरले पराजित भएका थिए । ८५ हजार मतदाता रहेको तिलोत्तमामा कुल ६४ हजार ७०७ मत खसेको थियो ।
तिलोत्तमा एमाले नेता घनश्याम भुसालको गृहनगर हो भने एमाले उपाध्यक्ष विष्णु पौडेलको पनि निर्वाचन क्षेत्र पनि पर्दछ । गृहमन्त्री बालकृष्ण खाँणको गृहनगर र जनमोर्चा अध्यक्ष चित्रबहादुर केसीले मतदान गरेको क्षेत्र समेत हो । तिलोत्तमामा २०७४ सालमा एमालेले प्रमुख र उपप्रमुख सहित १३ वडाअध्यक्ष जितेको थियो ।
यसपटक भने काँग्रेसले नौ र एमालेले सातवटा वडाअध्यक्ष जितेको छ । वडा नं २, ३, ५, ६, ९, १३, १४, १६ र १७ मा नेपाली कांग्रेसले विजय हासिल गरेको छ भने वडा नं १, ४, ७, १०, ११, १२ र १५ मा नेकपा एमालेले बिजय हासिल गरेको छ । तिलोत्तमामा कांग्रेस र माओवादीको गठबन्धन थियो ।
यो पनि पढ्नुहोस्
